Telangana Farm Loan Waiver 2024

రూ. 2 లక్షల రుణమాఫీకి సంబంధించి కీలక అప్డేట్ ఇచ్చారు తెలంగాణ డిప్యూటీ సీఎం భట్టి విక్రమార్క. ఎట్టి పరిస్థితుల్లోనూ రుణమాఫీ చేసి తీరుతామని స్పష్టం చేశారు. ముందుగా చెప్పిన తేదీ ఆగస్టు 15 కంటే ముందే దీన్ని పూర్తి చేసి చూపిస్తామని తేల్చి చెప్పారు. కొత్తగూడెంలో తాగు నీరు, రహదారులకు సంబంధించి అభివృద్ది కార్యక్రమాల్లో పాల్గొని గురువారం ఈ వ్యాఖ్యలు చేశారు.

తమది ప్రజా ప్రభుత్వమని, ఇచ్చిన ప్రతి హామీని కచ్చితంగా నెరవేర్చుతామని భట్టి స్పష్టం చేశారు. గతంలో కూడా రైతుబంధు డబ్బులు ఇవ్వదని తమపై ప్రతిపక్షాలు తప్పడు ప్రచారం చేశాయని, కానీ తామూ రూ. 7,500 కోట్లు రైతుల ఖతాలు జమ చేశామని చెప్పుకొచ్చారు. రైతుల సంక్షేమం కోసం తమ ప్రభుత్వం కట్టుబడి ఉందని పేర్కొన్నారు. రాబోయే రోజుల్లో రుణమాఫీతో పాటు రైతు భరోసా, పంట బీమా వంటి వాటికి ప్రభుత్వం అమలు చేయనున్నట్లు తెలుస్తోంది.

రైతు భరోసా విధివిధానాలు..
ఇక రైతు భరోసాకు సంబంధించి త్వరలోనే విధివిధానాలు రూపొందించనునట్లు భట్టి స్పష్టం చేశారు. రైతుల నుంచి అభిప్రాయ సేకరణ చేసి వాటిపై అసెంబీల్లో చర్చించిన అనంతరం తుది నిర్ణయం తీసుకుంటామన్నారు. కచ్చితంగా అర్హులకే రైతు భరోసా అందిస్తామని మరోమారు స్పష్టం చేసారు. సాగు చేసే రైతులకు రైతు భరోసా డబ్బులు అందిస్తామని, కొండలు, గుట్టలు, రియల్ ఎస్టేట్ భూములకు రైతు భరోసా సాయం అందించే ప్రసక్తే లేదని ప్రభుత్వం ఇప్పటికే తేల్చి చెప్పింది. అనర్హులకు ఈ పథకం అందకుండా కఠిన చర్యలు తీసుకుంటామని చెప్పింది.

కాగా రైతు రుణమాఫీకి కటాప్ తేదీలను కూడా ప్రభుత్వం ఇప్పటికే ప్రకటించింది. 2018 డిసెంబర్ 11 నుంచి 2023 డిసెంబర్ 9 వరకు తీసుకున్న రుణాలను మాఫీ చేయనున్నట్లు సీఎం రేవంత్ రెడ్డి కొద్ది రోజుల క్రితమే ప్రకటించారు. దాదాపు 47 లక్షల మంది ఈ స్కీమ్ ద్వారా ప్రయోజనం పొందనున్నట్లు తెలిపారు. రుణమాఫీ కోసం ప్రభుత్వానికి రూ. 31 వేల కోట్ల అససరం అవుతాయని అంచనా వేస్తున్నట్లు తెలిపారు. అలాగే రైతు భరోసా మార్గదర్శకాల కోసం కేబినెట్ సబ్ కమిటీని కూడా ఏర్పాటు చేస్తున్నట్లు తెలిపారు. జూలై 15 నాటికి భట్టి నేతృత్వంలో కేబినెట్ సబ్ కమిటీ రైతు భరోసాపై నివేదిక రూపొందించనుంది. దీనిపై అసెంబ్లీలో చర్చించి ప్రభుత్వం మార్గదర్శకాలు విడుదల చేయనుంది.

రూ. 7,500
గతంలో రైతుబంధు పేరుతో ఎకరాకు రూ. 10 వేల సాయం అందించింది బీఆర్ఎస్ ప్రభుత్వం. ఇప్పుడ పథకాన్ని రైతు భరోసాగా మార్చింది కాంగ్రెస్. రూ. 10 వేల సాయాన్ని రూ. 15 వేలకు పెంచనుంది. రెండు విడతల్లో రూ. 7,500 చొప్పున పెట్టుబడి సాయాన్ని విడుదల చేయనుంది. జూలై 15 తర్వాతే ఈ నిధులను విడుదల చేసే అవకాశముంది.