RAJIV YUVA VIKASAM LATEST UPDATE 2025

రాజీవ్‌ యువ వికాసం పథకం కింద తొలి విడతలో భాగంగా రూ.లక్షలోపు రుణాలు మంజూరు చేయాలని తెలంగాణ ప్రభుత్వం నిర్ణయించింది. జూన్‌ 2వ తేదీన అర్హులైన 5 లక్షల మందికి మంజూరు పత్రాల జారీలో భాగంగా కేటగిరీ-1, 2 యూనిట్లను కేటాయించనుంది. వీటిలో అర్హులైన 1.32 లక్షల మంది లబ్ధిదారులకు పథకాన్ని వెంటనే అమలు చేసేందుకు రూ.1,100 కోట్ల డబ్బు అవసరమని లెక్కకట్టింది. ఈ రెండు కేటగిరీలకు సంబంధించిన లబ్ధిదారులకు తొలి విడతలో ప్రాధాన్యమివ్వాలని, మిగతా కేటగిరీలకు 2, 3 విడతల్లో స్వయం ఉపాధి యూనిట్లను మంజూరు చేయాలని భావిస్తోంది. ఈ పథకం కింద కేటగిరీల వారీగా వచ్చిన దరఖాస్తుల సంఖ్య ఆధారంగా యూనిట్లు మంజూరు చేసేందుకు వివిధ సంక్షేమ శాఖలు కార్యాచరణను సిద్ధం చేస్తున్నాయి.

రాజీవ్‌ యువ వికాసం పథకానికి 16.23 లక్షల మంది నిరుద్యోగ యువకులు దరఖాస్తు చేసుకున్నారు. ఈ నెలాఖరుకు జిల్లా మంత్రుల అనుమతితో కలెక్టర్లు లబ్ధిదారుల ఎంపిక ప్రక్రియను పూర్తి చేయనున్నారు. యువవికాసం పథకం కోసం నెలకు రూ.2,000 కోట్ల చొప్పున 3 దఫాలుగా రూ.6,000 కోట్లు ఖర్చు చేయాలని సర్కారు నిర్ణయించింది. కేటగిరీ-1 యూనిట్లు మినహా మిగతా కేటగిరీ-2, 3, 4 యూనిట్లకు బ్యాంకు లింకేజీ మస్ట్. కేటగిరీ-1, 2 లోన్లకు దరఖాస్తులు తక్కువగా వచ్చాయి. ఈ రెండింటి కింద ప్రభుత్వం 2.8 లక్షల మంది అర్హులైన వారికి లబ్ధి చేకూర్చాలని అంచనా వేసింది. ఇందుకోసం తొలివిడతలో రూ.2 వేల కోట్లు అవసరమని లెక్కించింది. కేటగిరీ-1 కింద రూ.50 వేల లోపు రుణాలను 100 శాతం గ్రాంటుగా ఇస్తోంది. కేటగిరీ-1లో 1.58 లక్షల మందికి ఇవ్వాలని నిర్ణయించినప్పటికీ దరఖాస్తులు 39,401 మాత్రమే వచ్చాయి. కేటగిరీ-2లో రూ.50 వేలు- రూ.లక్షలోపు 1.22 లక్షల మందికి ఇవ్వాలని అంచనా వేయగా కేవలం 93,233 మంది మాత్రమే దరఖాస్తు చేశారు. ఇటీవల జరిగిన సమీక్షలో ఈ 2 కేటగిరీల్లో అర్హులైన లబ్ధిదారులందరికీ వెంటనే రుణాలివ్వాలని తెలంగాణ ప్రభుత్వం నిర్ణయించింది.