Indiramma Housing Scheme 2025

ఇందిరమ్మ ఇండ్ల పథకం అమలుపై మంత్రి పొంగులేటి శ్రీనివాస్ రెడ్డి తాజాగా కీలక ప్రకటనే చేశారు. తాజాగా ఇందిరమ్మ ఇండ్లకు సంబంధించి రాష్ట్రవ్యాప్తంగా సర్వే కొనసాగుతుందన్నారు. ఈ సర్వేను త్వరలో పూర్తి చేసి జనవరి 31లోపు ఇందిరమ్మ ఇళ్లను లబ్ధిదారులకు మంజూరు చేస్తామని మంత్రి శ్రీనివాస్ వెల్లడించారు. ఈ పథకంలో తొలి విడతలో అత్యంత పేదలకు ప్రాధాన్యత కల్పిస్తామని పేర్కొన్నారు.

తెలంగాణ ప్రభుత్వం ఇండ్లు లేని పేదలకు 5 లక్షల ఆర్థిక సాయం అందిస్తూ, ఈ పథకాన్ని అమలు చేస్తోంది. ప్రస్తుత దశలో సొంత స్థలం ఉన్న వారికి పథకాన్ని ప్రారంభించనున్నారు. అర్హుల గుర్తింపునకు గ్రామాలు, పట్టణాల్లో సర్వే కొనసాగుతోంది. సర్వేలో సేకరించిన వివరాలను ఇందిరమ్మ యాప్‌లో అప్‌లోడ్ చేస్తున్నారు.

పథకం అమలులో పారదర్శకతను కొనసాగించేందుకు గ్రామసభల ద్వారా లబ్ధిదారుల జాబితా రూపొందిస్తారు. ఈ జాబితాను ఇందిరమ్మ కమిటీలు సిద్ధం చేసి, ఆయా జిల్లాల కలెక్టర్లకు పంపుతారు. అనంతరం, జిల్లా ఇన్‌ఛార్జి మంత్రుల ఆమోదంతో లబ్ధిదారుల ఎంపిక జరుగుతుంది. ప్రభుత్వం రూ. 5 లక్షల సాయాన్ని నాలుగు దశల్లో లబ్ధిదారుల బ్యాంకు ఖాతాల్లో జమ చేస్తుంది. ఇవి పూర్తిగా మహిళల పేరుతోనే మంజూరు చేయబడతాయి.

ఈనెల 26 నుంచి రైతు భరోసా, ఇందిరమ్మ ఆత్మీయ భరోసా, రేషన్ కార్డుల పంపిణీ అనే మూడు కీలక పథకాలను ప్రభుత్వం అమలు చేయనున్నట్లు మంత్రి వెల్లడించారు. ఇందిరమ్మ ఇళ్లు పథకంతో పేదలకు గృహాలను అందించడమే కాకుండా, ఆర్థిక భద్రత కల్పించాలని ప్రభుత్వం కట్టుబడి ఉంది. అందరికీ ఇండ్లు కల్పించే లక్ష్యంతో రాష్ట్రవ్యాప్తంగా వినూత్న చర్యలు చేపట్టింది.